Asemblea Aberta Ourense se une á chamada internacional á movilización, convidando a tod@s a unirse á manifestación o vindeiro 1 de Xunio.
A continuación vos deixamos o MANIFESTO:
POBOS UNIDOS CONTRA A TROIKA: 1 DE XUÑO MANIFESTACIÓN INTERNACIONAL MAREA EUROPEA CONTRA OS RECORTES E POR UNHA VERDADEIRA DEMOCRACIA.
As brutais e inhumanas políticas de axuste impostas pola odiosa Troika (o Banco Central Europeo, o Fondo Monetario Internacional e a Comisión Europea) coa axuda dos gobernos cómplices, están a causar en Europa a maior crise da democracia das últimas décadas. Millóns de persoas estamos a ser condenadas ao paro, á pobreza e mesmo á morte por unha débeda ilexítima e impagábel, que na súa maior parte é privada; de bancos, grandes empresas e entidades financeiras. O rescate Europeo á banca, avalado e garantido polo Estado, unha vez máis privatiza os beneficios mentres socializa as perdas e a cambio esixe recortes sangrantes.
Coa escusa da crise da débeda modificaron a Constitución (Art.135.3) sen escoitar a nosa voz en referendo, impoñéndonos o desmantelamento dos servizos públicos como a Sanidade ou a Educación que é entregado ao sector privado como “oportunidade de negocio”, vulnerando así os dereitos sociais e laborais conquistados nas últimas décadas. Con iso provocouse, ademais, que miles de familias dos países afectados perdan a súa vivenda e a súa vida diaria.
A disolución das fronteiras entre o público e o privado alimenta unha corrupción impune que envilece a nosa sociedade e perverte a política no seu papel insubstituíbel de instrumento de acción cidadá. O obxectivo das privatizacións é o espolio, a concentración da riqueza e o afondamento nas reformas neoliberais.
Xa sexa a través dos memorandos impostos pola Troika a Grecia, Irlanda, Portugal ou Chipre ou do rescate financeiro no caso do Estado Español estase a producir un transvasamento de diñeiro público ás entidades financeiras a custa da perda de dereitos básicos, o empobrecemento xeneralizado da poboación e o aumento da desigualdade social en toda Europa.
Sabemos que o modelo de desenvolvemento insostíbel das últimas décadas baseado nun alto consumo de recursos enerxéticos e materias primas chegou á súa fin. Fronte ao crecemento ilimitado da economía financeira e especulativa é necesario un cambio de rumbo, pero non para salvar os bancos senón as persoas, as xeracións futuras e o planeta.
Este cambio de rumbo debe partir dunha democratización de Europa, dende os seus cidadáns/ás, para que os dereitos das persoas e as decisións políticas democráticas se impoñan á avaricia das institucións e mercados financeiros e das grandes multinacionais.
Cando celebramos o segundo aniversario do 15 M, da toma de conciencia política da cidadanía, dos novos movementos sociais que están a construír dende abaixo alternativas ás políticas neoliberais a través das asembleas, as mareas e as plataformas, sabemos que a nosa loita é internacional e esixe a converxencia da cidadanía de todos os países afectados.
En Europa, diversos colectivos procedentes do Estado Español, Francia, Italia, Grecia, Chipre, Irlanda, Inglaterra, Escocia, Alemaña e Eslovenia reunidos en Lisboa o pasado 26 de abril invitados polo movemento portugués ‘Que se Lixe a Troika’ facemos un chamamento a unha protesta internacional descentralizada o próximo 1 de Xuño contra as políticas de axuste do déficit baixo o lema “Pobos Unidos contra a Troika”.
Este é o comezo dun proceso descentralizado, inclusivo e participativo. Queremos construír colectivamente, unindo as nosas forzas e accións, protestando internacionalmente contra a Troika. Chamamos a todas as persoas, con ou sen partido, con ou sen traballo, con ou sen esperanza, a unirse a esta proposta o próximo 1 de Xuño. Aprememos a todas as organizacións políticas, movementos sociais, sindicatos, partidos, colectivos, grupos informais, a unirse nesta xornada internacional.
Queremos seguir ampliando as nosas alianzas, tanto a nivel nacional como internacional, xa que somos conscientes de que só a suma das nosas voces poderá deter as novas vagas de recortes que se están a preparar. Os pobos de Europa demostraron que non están dispostos a asumir máis sacrificios inútiles. Chegou o momento de demostrar a nosa capacidade para coordinar a loita por outra Europa, a Europa das persoas.
De norte a sur, de leste a oeste tomemos as rúas en toda Europa contra a Troika
Pola Democracia, a Liberdade e os Dereitos sociais.
Non ao golpe de estado financeiro. Non debemos, non pagamos
Hai alternativas. Hai solucións:
– Pola Xustiza social e ambiental
– Pola Transparencia e a Democracia Participativa
– En defensa duns Servizos Públicos e Universais
– Por unha Auditoria Cidadá da Débeda. Contra a Débeda ilexítima
Podedes atopar máis información no evento do Facebook: https://www.facebook.com/events/192329620920601/
Follow
